تم بحمد الله في يوم ١٥-٨-١٤٣٦هـ الموافق ل ٢٢-٥-٢٠١٦
خلصت من السنة التحضيرية بنزول درجة اخر مادة.
لسا متفاجئة من السرعة الرهيبة اللي عدت بيها السنة ويمر في ذاكرتي اول يوم جامعة بكل تفاصيله
من احكم النصايح اللي جاتني اني ما اخلي اول يوم جامعة يأثر على سنتي كلها ويعطيني انطباع كامل.
بالرغم من وجود اشخاص كويسين في محيطي وقتها نصحوني بحاجات لطيفة وهدأو من رعب السنة التحضيرية
لكن كان الصوت الأعلى لمجموعة من الناس كانت مستنيتنا حرفيًا نتخرج ونكون في قمة سعادتنا وفرحتنا بالتخرج عشان بكل بساطة تقلنا لا تفرحوا، الجامعة حتدمر كل حاجة حلوة في حياتكم!
واليوم انا اقلكم العكس تمامًا، لا تسمحوا لفئة احب اسميها مختمين او مدركين الجامعة انهم يخربوا عليكم فرحتكم
كلنا عارفين حجم المجهود اللي بذلتوه في فترة الثانوي من ناحية معدل او اختبارات قبول
وكلنا عارفين حجم الضغط النفسي اللي كنتو فيه لمجرد فكرة اختيار تخصص يناسب الباقي من حياتك، لذلك افرحوا وكونوا سعيدين لأنكم تستحقوا.
فئة مدركين الجامعة برضو كان عندهم اصرار عجيب على انهم يكرهوا أي احد في المرحلة الجامعية وعندهم دوافع مجهولة لنشر فكرة ان الجامعة مكان مظلم ومخيف وسيء ومليء بالوحوش والاشرار اللي مستنيين ينقضوا عليكم ليهجموا باختباراتهم وواجباتهم ومشاريعهم وبحوثهم عليك ليقتلوا حياتك الاجتماعية ويقضوا على معدلك الدراسي ويجروه للأسفل
وكانوا أيضًا يشجعوا على فكرة ان الدرجات العالية حاجة مستحيلة في المرحلة الجامعية عمومًا وفي السنة التحضيرية تحديدًا.
والواقع يا اصدقائي عكس ذلك،
ما حنضحك على بعض ونقلب الموضوع لحياة وردية وان الجامعة ستستقبلك بالاحضان وتدورلك على درجاتك بدالك
الموضوع ببساطة انك على قدر تعبك واجتهادك وتعاملك مع الحياة الجامعية بذكاء حتلاقي مقابل،
الاشخاص السيئين في كل مكان والعقبات مافي احد ينكر وجودها لكن الصورة المرعبة السلبية مبالغ فيها بطريقة غريبة،
مريت بأساتذة ودكاترة بشخصيات مختلفة، منهم اللطفاء اللي كانوا يساعدوا قدر الإمكان ومنهم اللي كان عندهم نية مبيتة للظلم بس قوانين التحضيري اوقفتهم ومنهم اللي كانوا يعطوك حقوقك بالزبط وبالملِ بدون زيادة او نقصان.
ومن هنا ننتقل لنقطتين مهمة عشان تكونوا مبسوطين في التحضيري والجامعة عمومًا:
أولًا:
السلبية قاتلها الله،
ابتعدوا عن كل الاشخاص السلبيين اللي بالمناسبة عددهم كبير في الجامعة وخارجها، قفلوا ادانيكم عن الناس المتحلطمة ٢٤/٧ بدون كلل او ملل،
الدكتورة ما تعرف تشرح، الجامعة مرا سيئة، التحضيري يبغو يصفونا، الاختبار حيكون مرا صعب هما مستقصديننا، الجامعة ما تسوي شي عشان مصلحتنا ودايمًا ضدنا.
حقيقي حقيقي بطلوا تقولوا الكلام دا ولا تسمعوه، لأنه ببساطة لا يسمن ولا يغني من جوع،
من تجربتي البسيطة ان فعلًا جامعاتنا فيها عيوب بس السلبية دي مبالغ فيها، السنة التحضيرية وعن تجربة كانت من ناحية الكرف اخف من الثانوي بمرااااااااااححلل وحتى الاختبارات كانت اقل بس البنات حواليني كانوا يدوروا نملة تمشي قدامهم عشان يقولوا جامعتنا فيها نمل ويتذمروا!
انا ما انكر وجود ضغط نفسي بسبب انو اسلوب حياة جديد ولغة جديدة للدراسة ونظام جديد واختبارات مصيرية
وهادي كلها تسبب ضغط نفسي يستحق الحلطمة اللي ما انصح انكم تكبتوها لانها تنفس عنكم بس برضو لا تتحول لسلبية قاتلة.
اتذكر بنات دفعتي كانوا يتحلطموا لأننا ندرس انقليزي بمعدل ٤ ساعات يوميًا بس لو فكروا فيها كان استوعبوا انو دا علم مش مجرد تحضير ودرجات.
ثانيًا:
تقبلوا فكرة الكرف،
وهذه نصيحة حياتية مو بس جامعية، تأكدوا ان مافي اي شي في الحياة يأتيك على طبق من ذهب، لازم تتعب وتجتهد وتشتغل في سبيل انك توصل للي تبغاه،
وهادي كانت مشكلتي مع مدركين الجامعة اللي كانوا يخوفونا من شبح اسمو كرف.
لا تعتقد انك في اي مرحلة من حياتك سوف تجلس على سريرك وتتمنى نجاحًا عمليًا ومهنيًا وماديًا ويأتيك ذلك دون أن تتحرك أو تبذل مجهودًا، المرحلة الجامعية عشان تمشي فيها لازم يكون عندك حب وجوع للكرف ورغبة في الانجاز
بمعنى اخر، الحقيقة انكم فعلًا حتكرفوا في الجامعة لكن الكرف هو الطريق اللي يوصلكم للنجاح
فإما ان تكرفوا بمتعة وسعادة او استعدوا لأن تعيشوا الباقي من عمركم في حلطمة لا منتهية.
وسر من اسرار الكرف بسعادة، انك تختار المجال اللي انت تحبه فعلًا، مو لأن ماما وبابا قالولك تدخل التخصص دا أو لأن درجاتك عالية، أو لأن المجتمع يحب ويقدر الشخص اللي يدخل دا التخصص.
التخصص حياة وروتين يلاحقك يوميًا وقرار سعادتك او تعاستك في يدك، مش بالضرورة تحب كل المواد لكن معظمها وتتقبل باقيها وتكره نسبة ٢٪ منها.
المواد اللي بتدرسها في الجامعة عبارة عن علم، والعلم ممتع جدًا لاقصى حد اذا كنت مهتم فيه بالمقام الأول.
اتذكر ليلة اختبار مادة ادارة الاعمال كنت اذاكرها بسعادة لأني قريت فيها معلومات عن رؤية ٢٠٣٠ كرؤية عمومًا وعن التخطيط.
وعمومًا صح ان انظمتنا تحفز على الدراسة اكثر من التعلم بس كونوا حريصين تجمعوا بين الاتنين.
وعلى سيرة الجمع، في فئة طالعة اليومين دي في السوشيل ميديا وبتنشر فكر محتواه ان الجامعة مو مهمة وانك حتشتغل في وظيفة غير تخصصك او حتبدأ مشروعك الخاص وان المعدل الدراسي في اخر قائمة الاشياء التي يجدر بك ان تهتم بها وانك لازم تحرص على تكوين علاقات اجتماعية وان تهتم بالخبرة العملية والدورات خارج نطاق الجامعة،
بغض النظر عن صحة الفكرة من عدمها وموافقتنا عليها او رفضها
مين قال ما تقدر تسوي الاتنين ؟
يعني خلونا اول شي نناقش موضوع الدرجات العالية، من كلام الناس انا قلت خلاص انسى الدرجات اللي اتعودت عليها في الثانوي والمستوى اللي كنت احب اكون فيه، وفجأة خلصت التحضيري بمعدل ٤ من ٤ ولله الحمد وفوق دا كلو جبت١٠٠ في كل المواد ما عدا مادة وحدة.
ودي نقطة مهمة لأن فعلًا ناس كتير ما جابت درجات عالية في التحضيري لمجرد انها كانت مقتنعة انها ما تقدر وانو مافي احد يجيب درجات عالية في التحضيري.
أما بخصوص الانجاز خارج نطاق الجامعة ففعلًا السنة هادي من اكتر سنين حياتي اللي انجزت فيها، اتطوعت في تنظيم اكتر من ملتقى وكنت من المنظمين للقاء العلمي السابع في الجامعة، والقيت كلمة امام عميدة كلية السنة التحضيرية وسمعت كلام كان يستحق كل التعب اللي مريت بيه دي السنة، دا غير اني كنت ليدر لشعبتي وعضوة في المجلس الاستشاري ودخلت اكتر من دورة وفي رمضان باذن الله حيكون عندي تدريب صيفي.
مش قاصدة استعرض انجازاتي البسيطة جدًا قدامكم بس الفكرة اللي ابغا اوصلها ان كلام الناس مو دايمًا صح وكون انو هما ما قدروا لسببٍ ما يكونوا كويسين في اكتر من طريق دا مو معناه انكم حتكونوا زيهم، تقدروا تجمعوا المسارين سوا وتكونوا كويسين فيهم وتضيفولهم مسار تالت ورابع وعاشر!
نصيحة مهمة مرا، اسوأ شي تسويه في حق نفسك انك تتحجج بالظروف وتخليها شماعة لكل اخطائك، السنة دي مريت بظروف خارج الدراسة وحده الله يعلم صعوبتها وتأثيرها على نفسيتي، بس لازم في مرحلة من حياتك تكون شجاع وتختار أي فئة من الناس تبغا تكون، الناس اللي استسلمت وتركت للظروف تحدد مصيرها، ولا الناس اللي قررت تصنع قدرها بيدها وتتحكم في حياتها.
وأخيرًا،
المرحلة الجامعية ممتعة، قد تكون مليانة عقبات بس برضو مليانة فرص، مو صعبة ومو سهلة، في النص بين الاتنين لأن الحياة كلها اصلًا على النمط دا، حتقابلوا اشخاص كتيرين، ظاهرهم شر وباطنهم خير والعكس.
الأهم انها ٤ سنين من الفرص اللي حتصنع شخصيتك ومستقبلك، كونوا حريصين انكم تلاقوا حل وسط يخليكم تطلعوا منها بمعدل عالي وخبرة عملية وتجربة حياتية مثرية وممتعة.
معلومة: الخلاصة والتجربة دي شارك في تكوينها عدد من اصدقائي من مختلف التخصصات والجامعات ومن مسارات مختلفة للسنة التحضيرية.
واخر قصة تدعو للتفاؤل، صديقتي درست سنة تحضيرية طبية وانتهت منها بمعدل ٤ من ٤ تبارك الرحمن.
طيب النص التاني هنا لصديقاتي البنات اللي حابين يدخلوا مسار اداري في جامعة ام القرى
سبق واتكلمت في تدوينة سابقة عن الترم الاول للمسار الاداري واعطيت نبذة وحاكمل دحين،
من الحاجات الجديدة اللي سارت انو فتحوا للبنات قسمين جديدة
فسارت التخصصات تحت المسار الاداري كالتالي:
١- ادارة اعمال، ٢- تسويق،٣- ادارة فندقة وسياحة،٤- محاسبة.
دفعتي في ترتيب الرغبات ما طلعلهم المحاسبة
لكن على موقع الجامعة كان موجود للدفعة اللي بعدنا
في رابط مهم مهم يطلعوا عليه كل اللي ناويين يسجلوا في ام القرى، فيه مواعيد القبول والتخصصات وكل التغييرات اللي سارت
السنة التحضيرية في ام القرى للمسار الاداري من وجهة نظري من اكتر السنين التحضيرية كفاءة في معظم جامعات المملكة
لانو المواد اللي بتندرس فيها في الترمين كلها حتفيدكم في مسيرتكم المهنية والدراسية وكلها مرتبطة بالتخصصات تحت المسار الاداري.
وعندي مشاكل مع نوعين من الناس، يا يصعبوا التحضيري الاداري مرا او يسهلوه لدرجة الاستتفاه
وفي الحقيقة هو في النص، في مواد مشتركة بيننا وبين التحضيري الطبي زي الانقليزي حق الترم الاول والحاسب ومهارات التعلم والبرمجة ، وحتى بنات الطبي مو كلهم كانوا بيقدروا يجتازوها او يجيبوا فيها درجات عالية ونفس الشي لمادة الرياضيات اللي كانت مشتركة بيننا وبين بنات العلمي، فلازم تعرفوا انها حاجة في النص، اذا اجتهدتي وشديتي حيلك كانت سهلة، غير ذلك حتكون اقرب للاستحالة.
الاستاذات عمومًا كانوا لطيفين بس طبيعي تلاقي وحدة اسلوبها ما يناسبك.
نجي للمواد:
ِِاللغة الانجليزية الادارية
حتكون كتابين commerce1 and commerce 2
المادة دي ممتعة بطريقة مو طبيعية وفيها علم يشد جدًآ، هيا لغة انجليزية لكن من منظور اداري بحت وتركيزهم في المادة دي اكتر شي على فهمك للمصطلحات الادارية ويهمهم يقيسوا معرفتك بالمعلومات اللي جوت الكتاب اكتر من القواعد اللغوية
تقسيم الدرجات كان ٥٠ اختبار نهائي، ٣٠ ميدتيرم، ٢٠ مشاركة وحضور وحاجات تتفقوا عليها مع الدكتورة.
وبرضو ليها النصيب الاكبر من ساعات يومكم.
من ناحية انهم يقيسوا معرفتك، لا تستبعدي في الاختبار تجيكي اسئلة عن معلومة جات في قطعة قراءة، عشان كدا وتوفيرًا لوقتك ومجهودك، ركزي في المحاضرة وافهمي المعلومات وتعلق في مخك ان شاء الله.
الاحصاء
النسخة المحببة من الرياضيات
كانت مادة ممتعة وسهلة في المذاكرة واختبار الميدتيرم كان لطيف جدًا ما عدا تلاتة اسئلة كانت شوية تحتاج تركيز عالي لان فكرتها جديدة بس بسيطة، الصدمة كانت في الاختبار النهائى ودا شي كان اول مرا يسير على حد علمي،
نص الاسئلة افكار ما اتعودنا عليها، يعني هيا تنحل بس صادمة لاننا ما اخدنا خبر عنها والوقت اضيق على اننا لسا نستنتج بس ارجع اقول انها تنحل والحمدلله كتير بنات اعرفهم جابوا فيها درجة عالية.
تقسيم الدرجات كان ٦٠ اختبار نهائي و ٣٠ ميدتيرم و ١٠ كويزات وواجبات.
البرمجة
المادة دي كانت غريبة، وشعبتي كان نصيبها مع استاذة بطيئة وتتلكع وتتأخر سواء في وقت المحاضرة او في المنهج
لكن بتساهيل الله وبدروس التقوية وبصديقة تخصصها حاسب الي ساعدتني كتير مشيت اموري الحمدلله
وبالرغم من ان الاختبار النهائي كان صعب إلى حدٍ ما بس بفضل من الله قدرت اجيب الفل مارك بدون بونس.
المادة عمومًا حلوة ومو صعبة بس تحتاج فهم ومتابعة مستمرة، ما ينفع تهمل لين ليلة الاختبار وتقرري تفهمي كل شي وقتها.
تقسيم الدرجات كان ٣٠ ميد تيرم، ١٥ درجة كويزات ، ١٥ اختبار عملي نهائي، ٤٠ اختبار نهائي نظري.
الكويزات كانت ٤ وكل واحد ب ٥ درجات، كانت على موقع الجامعة للتعليم الالكتروني ونختبرها قدامهم على اجهزة الجامعة واختاروا افضل ٣ منها.
ادارة الاعمال
المادة دي كانت مادة تخصص بحت، انبسطت فيها مرا، كانت تتكلم عن مبادئ ادارة الاعمال وكانوا بيتطرقوا لنظريات حديثة وكانوا يستعرضوا الناحية العربية من الادارة، معلومات مثرية وممتعة ومفيدة.
المادة كانت سهلة مرا ومعظم الاسئلة من الواجب اللي يعطونا هوا.
الدرجات
٤٠ اختبار نهائي، ٢٠ ميدتيرم، ٢٠ كويزات، ٢٠ حضور واعمال سنة ومشاركة وواجبات.
اخيرًا زي التدوينة اللي قبلها
حسابي في تويتر مفتوح ليكم ولاسئلتكم ولاستفساراتكم واي حاجة تحتاجوا تعرفوها كلموني على الدي ام
@ِErti8a2
