قبل ما ادخل الجامعة كنت مخططة اني في نهاية السنة حاكتب تدوينة طويلة مفصلة عن الجامعة
بدايةً من الثانوي والمعدلات والقدرات و التحصيلي نهايةً باخر درجة تنزل في تجربة التحضيري والتخصص اللي ربي ييسرلي انقبل فيه
لكن !
استجدت سببين خلتني اقرر اكتب جزئين من التدوينة مسبقًا
اول حاجة التدوينة دي حتتكلم عن حاجتين
اللغة الانجليزية ودورها في الجامعة وكيف ممكن تتعلمها
الجزء التاني حيتكلم عن الترم الأول في جامعة أم القرى تحضيري مسار اداري بكل تفاصيله
والسببين اللي خلتني اكتب التدوينة دحين
١- الوقت، كتير من الناس اللي تالتة ثانوي دحين ممكن تلحق وتطور لغتها الانجليزية، الوقت يكفي بالراحة،
وكمان لو كان في ناس حاطة بعين الاعتبار انها تدخل مسار اداري في ام القرى تحتاج تفاصيل دقيقة حاليًا عشان تاخد قرار.
٢- اني حاليًا فاكرة تقريبًا معظم الحاجات اللي سارت الترم دا بتفاصيل اكتر من اللي حافتكرها بعدين.
نبدأ ؟
طيب اول شي مو عارفة كيف اشرحلكم قد ايش مهم ومفيد انك تطور لغتك
ومو عارفة ليش الناس اللي بتنصح النصيحة دي ينعدو عالاصابع
معظم الجامعات حاليًا بتشترط سنة تحضيرية لمعظم او كل التخصصات عشان تنقبل فيها
مهما كان مسارك في التحضيري انت لازم تدرس مادة اسمها لغة انجليزية وعدد ساعاتها ليه النصيب الاعلى من المعدل
طيب طالما انا حادرسها واتعلمها في التحضيري ليش اطورها من قبل ؟
لاسباب كتير واولها ان الجامعات بتسوي للطلبة اختبار اسمو اختبار تحديد المستوى
اختبار تحديد المستوى لو كانت لغتك اصلًا كويسة وقدرت تحل فيه كويس واخدت الدرجة المطلوبة ممكن ينزلك اعفاء
ايش يعني اعفاء ؟
يعني تاخد في المادة هادي A+ باردة مبردة.
وان كانت جامعتك زي جامعتي العزيزة لاغية اختبار تحديد المستوى من الاصل ف ايش الفايدة ؟
الفايدة انو موادك كطالب سنة تحضيرية كلها بالانقليزي
ما تتخيل قد ايش حتوفر على نفسك ساعات وساعات وساعات من الترجمة
وتركز على انك تفهم المادة العلمية
بالاضافة انو لنفترض انك ترجمت كل كلمة موجودة عندك في المنهج
انت كدا ضفت لنفسك عبء غير انك تذاكر وتحفظ المادة اللي بتدرسها انك لسا حتحفظ كل الكلمات الجديدة عليك.
غير كدا وكدا
من الحركات البايخة اللي سارتلي في التحضيري انو كويز من كويزات الانقلش زاكرنالو واتأجل بعدين انحط موعد واتأجل تاني
المرا التالتة ما كان فيا حيل ازاكر
اكتفيت باني اقرأ بسرعة وهمشت تفاصيل مهمة مرا
جا وقت الكويز خلصنا واكتشفت اني حليت كل الاسئلة صح وكنت شايفة الاختبار سهل جدًا رغم ان مزاكرتي ضعيفة
ليه طيب ؟
لأني حليت بالاحساس
لمن تتعلم اللغة وتتعود عليها وتسير جزء من يومك
يمكن ما تفتكر القاعدة او ليش السؤال دا ينحل كدا لكن انت عارف انو الجواب صح كدا لأنو It sounds right.
لو دخلت الجامعة وعندك لغة انجليزية متوسطة ريحت نفسك من نص تعب التحضيري وضمنت لنفسك معدل عالي.
طيب بعد الشرح المطول لقد ايش الشي دا مهم
كيف تطور لغتك الانجليزية؟
الطرق كتيرة جدًا لكن الله يخليك لا تحصرها في معهد انت مضطر تتفرغ عشانو
او تضطر انك توفر مبلغ عالي وتحط كل الحاجات دي حواجز
ياما سمعنا عن ناس كل صيفية راحت تدرس في معهد في بريطانيا وامريكا وترجع زي ما راحت.
اول طريقة ودي تجربة شخصية بحت
التجربة ساهمت فيها عوامل كتير مرا لكن الموقع دا كان الاهم
الموقع اسمو ِEnglishLive
http://englishlive.ef.com/ar-sa/
ميزة الموقع دا انو على وقتك
عبارة عن كورس اونلاين
اول حاجة حيعملولك اختبار تحديد مستوى وحيحطوك في المستوى المناسب
أيًا كان مستواك فهو يتكون من عدة وحدات
الوحدة بتكون شاملة لتدريبات مرا كتير لكلمات جديدة وقاعدات وكلاسات مع مدرسين وطلاب ورايتينق
واهم ميزة انهم مستخدمين استراتيجية التعليم بالترفيه
حسيت بفرق اكيد ان لغتي اتحسنت عمومًا لكن في نفس يوم الكويز اللي ما زاكرتلو
طلعنا والناس كلها تقول ان الlistening كان صعب جدًا وانو المعلومات داخلة في بعضها
رغم انو بالنسبالي كان واضح جدًا
والسبب ان الموقع دا فيه تدريبات استماع كتيرة بلهجة بريطانية تخلي ادنك متعودة على اللغة ومو صعب تفهمها.
طريقة تانية نفعت معايا وساعدتني لكن عشان اكون صادقة انا ما استغليتها بافضل شكل
كانت الافلام والمسلسلات
اخر فترة كنت اتفرجها كتير وسرت احاول اتفرجها بدون ترجمة قد ما اقدر
لكن لو حابب تستخدم الاستراتيجية دي بشكل افضل مني حاحط لينك لقناة فلمها على اليوتيوب
https://www.youtube.com/user/Fallimha
وكمان ممكن تحمل ابلكيشن Ted
تيد عبارة عن موسوعة
الفيديوهات متفجرة بافكار جديدة تخليك تتعلم دروس عظيمة
وبكدا انت حسنت لغتك وزدت من رصيد معلوماتك.
الطريقة الاخيرة لسا ما جربتها لكن من اهداف ٢٠١٦
تلاقوها في رابط التويتات دا
وبكدا خلصنا من الجزء الاول
ما اتوقع في فئة كبيرة مهتمة بتكملة التدوينة
لكن عمومًا اي شخص محتاج مساعدة في أي شي يخص التحضيري
حاحط حساباتي في مواقع التواصل الاجتماعي ورابط الاسك حقي في نهاية التدوينة
طيب نجي للجزء التاني
تجربة اول ترم تحضيري مسار اداري في جامعة ام القرى.
لو انتي بنت تحديدًا ومهتمة بكلية ادارة الاعمال حاحاول اعطي كل تفصيل صغير موجود في ذاكرتي ممكن ينفعك
اول حاجة لازم تعرفي ان عشان تنقبلي لازم تكوني دارسة علمي في الثانوي ومعدلك مو اقل من ٩٠٪
النسبة الموزونة للقبول تختلف من سنة للتانية وام القرى بالعادة ما تعلن على كم وقف القبول.
اول حاجة لازم تعرفوها اني انا دافورة بس بمعناها الكويس
متخرجة من الثانوي بنسبة ٩٩٪ والقدرات ٩٠ والتحصيلي ٨٨
وكان قرار اصعب من الصعب عليا اني ادخل تحضيري اداري
بس كنت كل يوم احمد ربنا عليه
لاني ببساطة ما كان في ولا مادة اكرهها
ما كنت احبها كلها بس ما كرهت ولا وحدة فيهم
الشي دا اثر في روتين يومي وكنت مبسوطة دايمًا
تجيني لحظات تنغص عليا من كلام الناس ودقدقتهم وحتى اسئلتهم الصريحة المباشرة ومحتواها ليش ما دخلتي طب او قسم زي الناس !
او الناس اللي تستحقر بنات الاداري عمومًا وتشوفهم اقرب ما يكون للفشل وقلة المسؤولية
بس الحمدلله اني اخدت القرار دا لأني انا اللي حاعيش الحياة دي مو الناس.
والحمدلله لأني اتبعت قلبي وشغفي وعقلي.
طيب انا درست السنة التحضيري في مبنى كلية الششة
المبنى صغير ومعدوم
يتكون من اربعة ادوار والممرات فيه ضيقة جدًا
في كافتيريتين مستوى الاكل فيها مو مرا واسعارها غالية
حارسات الامن اسلوبهم سيء وحاسين اننا عايشين في سجن
كابة صح ؟
الجانب الكويس في الموضوع انو باذن الله السنة الجيا ويارب ما يرجعوا في كلامهم المرا دي
حننتقل كلنا كبنات للمبنى الجديد في العابدية.
بالنسبة للاستاذات والدكتورات
عمومًا والاغلب انو كل وحدة فيهم احسن من التانية
وايوا في ممكن تلاقي دكتورات ما يناسبوكي بس انا اشوف ان النسبة ضئيلة.
خطة التحضيري الاداري :
الترم الأول : رياضيات - حاسب الي - لغة انجليزية - مهارات التعلم.
الترم الثاني : احصاء - ادارة اعمال - لغة انجليزية ( commerce ) - حاسب الي ( برمجة ).
ايش مشكلة التحضيري الاداري ؟
ان البنات اللي يدخلوه
يكونوا يا اما ناس ما تبغاه اصلًا وداخلتو عشان كان باقيلها درجة وتنقبل مسار طبي
وناس تبغاه لأن بالنسبالها المسار دا سهل ويعني ايش يبغالو كلو ادارة.
وفي النهاية الفئتين كلها مستتفهة المسار الاداري وعلبالها سهل.
هل دا معناه انو صعب ؟
لا ابدًا بس اعطي الاشياء حقها
ادارة الاعمال عمومًا كلية وقسم قائم على علم
ابدًا لا تتوقعي انك حتدخلي وتلعبي وتجيبي معدل عالي.
اول مادة اللغة الانجليزية
اتكلمت عنها فوق بس حافصل حاليًا اكتر
اول شي على دفعتي انلغى شي اسمو اختبار تحديد المستوى
اذا كنتي تبغي اعفاء لازم تدخلي اختبار الايلتس وتجيبي فيه درجة محددة
حتدرسي مستويين من الانقلش
Elementary المستوى الثاني
pre-intermediate المستوى الثالث
المستوى التاني حتختبري فيه اختبار ميدتيرم من ٣٠ درجة
والفاينل حيكون في المستوى التالت من ٥٠ درجة
المادة ليها النصيب الاعلى في ساعات المعدل ( ٦ ساعات ) وكمان ساعات يومك
يعني حيكون في الاسبوع في ١٦ ساعة
حتمر عليكي ايام تاخدي كل يوم ٤ ساعات انقلش متواصلة او متفرقة.
انا كنت اول وحدة اتذمر من الموضوع دا لكن في النهاية كنت اكتر وحدة تستفيد من المادة دي
الانقلش مو بس مادة تجيبي فيها درجات وترفع معدلك
هيا عبارة عن كورس مكثف مجاني
اربعة ساعات يوميًا مع استاذة ما تعرف تتكلم عربي كانت كفيلة بانها تحسن لغتي عشرة مرات زيادة
فانتي ما بين خيارين اما انك تتذمري من طول المحاضرة
او تستغليها وتتعلمي.
اسئلة الاختبارين عمومًا كانت سهلة وما كان فيها واجبات كتير
يمكن الكويزات كتيرة شوية لكن تسهلك الاختبار النهائي
المستوى التالت حيحتاج منك جهد اكبر من التاني لكن كلها سهلة.
الحاسب الالي
المادة دي مو صعبة لكن تعتبر جديدة اكتر من بقية المواد
لانها المادة الوحيدة اللي نظرية وبالانقلش
فانك تتعودي عليها ياخد وقت اكتر من باقي المواد
ساعتين بس من المعدل
على دفعتي سار فيه حاجة اسمها مقررات الكترونية
كانت المادة عبارة عن سلايدات هيا دي اللي تتزاكر
تتحمل من الموقع اللي حيكون ليكي فيه حساب
حتنزلك واجبات هناك برضو
الكويزات كانت عليه
الموضوع كان متعب شوية من ناحية انو النت في الجامعة وتجهيزات الشبكة في مبنانا سيئة بس حاولوا يحلوا المشاكل دي قد ما يقدروا وكمان كان الميد والفاينل على ورق.
كان توزيع الدرجات ٣٠ على الميد
٢٠ كويزات
١٠ اختبار عملي نهائي
٤٠ اختبار نظري نهائي.
المادة في بدايتها دسمة بس ليلة الفاينل كانت سهلة جدًا ومو متعبة لأننا اختبرنا كويز على كل تشابتر.
الرياضيات
المادة التي اتفق شعبنا الحبيب على حبها
ما اعرف ايش سر علاقتكم السيئة للمادة دي لكن اتوقع انو المشاعر السلبية هيا الحاجز عن الدرجات الكويسة
انا اشوفها اسهل من رياضيات الثانوي
توزيع الدرجات كان ١٠ كويزات وواجبات
٣٠ ميدتيرم
٦٠ فاينل
تحتاجي في محاضرة الرياضيات انك تركزي مع الاستاذة وتكتبي الحاجات اللي بتكتبها لانو الكتاب مو شارح الطريقة بالتفصيل.
المشكلة اللي كانوا يعانوا منها البنات كانت في نفس وقت الاختبار
اول شي انو الاسئلة عددها قليل
والسؤال عليه درجة ونص
والوقت كان يا دوبك بيكفي
فعشان تحلي المشكلة دي لازم تتدربي مرا كتير وابدًا لا تزاكري رياضيات بالنظر.
وحيعطوكم مراجعة قبل الاختبار، مهمة مهمة مهمة مهمة.
مادة مهارات التعلم
احب اسميها السهل الممتنع
لانها بالعربي فمادة سهلة جدًا
مطلوب منك في المادة دي انك تسوي عمل تطوعي
برزنتيشن
ومخيرة ما بين بحث او فيلم وثائقي او ابتكار.
كل هادي مجموعها ٥٠ درجة
مافيها ميدتيرم
فبالتالي حتدخلي الفاينل وانتي ما قريتي حرف من الكتاب
وهنا نعرف ليش سهل ممتنع
لانو الفاينل مرا مرا مرا سهل
بس لو تبغي الايه بلس لازم تزاكريها
وهيا طويلة شوية ومزاكرتها متعبة لانها تحتاج حفظ
فلو كنتي شاطرة وما تبغي لنفسك التعب حاولي انك تقريها اول باول عشان توصلي الفاينل وانتي عندك فكرة الكتاب يتكلم عن ايش.
لكن ما عدا ذلك المادة ممتعة بكل شي فيها وسهلة
والحاجات المطلوبة منك خصوصًا البحث حتتعلمي كيف تسويه ودا كنز حقيقي
لانك حتتعلمي كيف تسوي بحث بادق واصغر التفاصيل.
بعيدًا عن المواد والدرجات
انا كنت ليدر لشعبتي
اخترت اكون جزء من التجربة دي عشان عارفة انها حتعلمني حاجات كتير
حتعلمني كيف اكون ليدر وكيف اتعامل مع الناس وكيف اصبر على طلباتهم المزعجة
كوني ليدر فتحلي باب اني اكون من ضمن المجلس الاستشاري لفرع الششة
كان ليا صوت وساهمت في اني اخد جزء من القرارات.
وتجربتي ما خلصت
ناوية ان شاء الله اسجل في نادي السنة التحضيرية واكون عضو فعال اكتر .
الخلاصة
اول ترم تحضيري كان ممتع، ما كان شديد السهولة وما كان شديد الصعوبة
انك تجيبي ايه بلس في كل المواد حاجة قابلة للتحقيق لكن لا عمرك تستهيني بالسنة التحضيرية وموادها
ولا تقنعي نفسك ان الناس دي موجودة عشان تضرك او تبغا تنقصك درجات.
خلي كل حاجة مسخرة عشانك واستغلي كل فرصة تعدي عليكي وانبسطي.
التحضيري مو بس دراسة ودرجات
التحضيري اذا استغليتيها صح تجربة حياتية مميزة.
حساباتي لو اي شخص عندو استفسار
twitter: @erti8a2
https://ask.fm/Ertiqaa
ويارب اكون افدت لو شخص واحد
